“Noyabrın 19-da saat 20:00-da Tofiq Bəhramov adına Respublika stadionunda Albaniya yığması ilə yoldaşlıq oyunu keçirəcək Azərbaycan millisinin heyətində dəyişiklik edilib. Kamran Ağayev millinin heyətindən çıxarılıb. Onun əvəzinə Anar Nəzirov milli komandanın heyətinə dəvət olunub.” 

2008-ci ilin 17 noyabrında bir çox xəbər agentlikləri bu xəbəri yayınladı. Milli komandanın 1 nömrəsi olan Kamran qəflətən heyətdən uzaqlaşdırılmışdı. Buna səbəb anası – Sədaqət xanım Əsgərovanın vəfat etməsi oldu. Sədaqət xanım uzun sürən xəstəlikdən sonra 57 yaşında dünyasını dəyişdi. Anasının ölümü Kamranı çox sarsıtdı. Hər oyunqabağı onunla danışıb xeyir-dua alan Kamran təkcə anasını yox, ən böyük mənəvi dəstəyini itirdi. Bu gün Sədaqət xanımın doğum günüdü. Bu insan haqda yazmağı, oxucularımıza onu tanıtmağı özümüzə borc bildik.

Əsgərova Sədaqət Əziz qızı 1951-ci il may ayının 30-da Dəvəçi (indiki Şabran) şəhərində anadan olmuşdur. 1968-ci ildə orta məktəbi bitirdikdən sonra əmək fəaliyyətinə başlamışdır. Azərbaycan Dövlət Universitetinin biologiya fakultəsini bitirmişdir. Rayon Xalq Maarif Şöbəsində mühasib köməkçisi, Dəvəçi şəhər 2 saylı orta məktəbdə kimya-biologiya müəllimi, 1979-cu ildən 1985-ci ilədək 2 saylı Körpələr evi – Uşaq Bağçasında müdir və 1985-ci ildən ömrünün sonlarına qədər isə Dəvəçi şəhər 2 saylı orta məktəbdə direktor vəzifəsində çalışmışdır.

Sovetlər dövründə 2 çağırış Dəvəçi şəhər Sovetinin deputatı, 1 çağırış isə rayon sovetinin deputatı (1990-cı ilə qədər) olmuşdur. Azərbaycan Respublikası “Sevil” Qadin Məclisinin rayon şöbəsinin sədri, Dəvəçi bələdiyyəsinin üzvü olmuşdur. Müstəqil Azərbaycan Respublikasında 2 dəfə Qadınlar Qurultayının və 2 dəfə Müəllimlər Qurultayının iştirakçısı olmuşdur. “20-ci əsr Azərbaycan qadınları” ensiklopedik toplusunda Sədaqət xanım haqqında da yazılmışdır. 2007-ci ildə, ölümündən 1 il əvvəl Azərbaycan Respublikasının əməkdar müəllimi adına layiq görülmüşdür.

Bəli, bu əməksevər insanın həyatına qısaca səyahət etdik. Peşəsindən asılı olmayaraq seçilmişlərdən olmaq çox az insana nəsib olur. Kamran da məhz belələrindəndir. Belə bir evladı dünyaya gətirən ana isə Qəhrəman olmalıdı. Bu gün Qəhrəman ana sağ olsaydı yəgin ki, oğlu ilə fəxr edərdi.

Allah rəhmət eləsin!